کتاب، رباعیلرنینگ فیسیلتی سی
کتاب: رباعیلرنینگ فیسیلتی سی!
اوکتای اسلانینگ قلمیدن (راه سوم)
1
زلفی نی اۉریب اۉریب، اوستیمگه اۉرتی یاپینگ
قوقوسیدن روحیمگه، بوی سنبل نی تاپینگ
زاهد بو دېب اۉیله منگ، کفر دینیگه بېرینگ
ذاتاً من تېنگری دېگن، بو ایمانیمدن چاپینگ
2
بلبل نینگ اۉلیمیگه، گل دلدن یانرمیش
ماضی جفالریدن، یوره گیدن قانرمیش
یپراق نی کفن قیلیب، سېسسیز پیشیمان بۉلیب
هر موسم بهارده، اۉزی نی غم سانرمیش
3
نفیس شلاله معطر، ساچلرینگ عنبرفشان
باقیشلرینگ ماه حور دیر، کۉزلرینگ جنت نشان
سۉز او دیر که قد گل، ماه تابان رخینگ
لبدن سۉز دلربا، گل یوزینگ ارغوان
4
مجذوب بو یوزینگگه من، قۉیکه اونگه مېن سۉیله ی
رباعی لهب دردیم نی، گۉلگه سیگه مېن اېله ی
عشق اوچون سازنی چلسنگ، قۉلینگگه من مضرابینگ
عشق که یانماق اوچون بار، یانیب کیفی نی بیله ی
5
نفس آلسم سیندن دیر، نفسیمگه سېن نفس
بۉلمه سنگ نفسسیز من، نفسینگگه مېن نفس
بو راز یشمیم نی، روحگه اۉرگتیم سېندن
بو روح یشمیمگه، سېندن یمین نفس
6
سن مېنیم تیلیم بۉلدینگ، هم وجودیم عالمیم
سۉزلرنی توغری توککن، هم تفکر و علمیم
حراست و محفوظ، بو آبروینگ دېب اثرینگ
درد اورتاق و یولداش، سِرداش بۉلدینگ قلمیم
7
منزل قیسقهسیز اوزاق، من نیرده جانان نیرده
خیالی کۉزلریمده، کۉریلش پرده پرده
قلمیم کۉز یاشیم له، توکر او رباعیلر
اوندن باد صبا عشق، افشانله یدی سحرده
8
بیلمی من قدر می بو؟ صبر مېنده یارده ناز
نیمه بېره دی فغان؟ عشققه یانماق دیر نیاز
اسمی جان اۉزی جانان، ییغله مه قلبیم یېتر
دردینگ نینگ فریادی نی، رباعیلر بیلن یاز
9
بیر تۉرنه بۉلیب سېنگه، یېردن اوچماق خواهلی من
سودانگ اوچون زهر نی، ذوق له ایچماق خواهلی من
بارلیگینگده یۉق بۉلیب، سېنگه قاووشماق طلب
قسمتیم نی ایمان له، تۉغری بیچماق خواهلی من
10
نه دنیادن آنگله گن، نه عشق نی بیلگن بار
نه بیر درمان قۉلگه، نه کۉز یاشی نی سیلگن بار
ییقیتیب ویران قیلدی، شو دل دېوانه نی
غم و کدر دن باشقه، نه لطف قیلیب کېلگن بار
11
ینه سۉلگن گللریم، قلبیمده آچیلیر می؟
کولیمسه و قه قه لر، بو قلبدن ساچیلیر می؟
عجبا یایله می، تنیمدن گۉزل قوقوینگ؟
سینه مده آتشینگ بار، عشق اوچون قاچیلیرمی؟
12
قه یېرده بۉلسنگ بۉلگین، قلبیم سېنینگ له دیر یار
سودانگ قلبیمده بیر گل، گیزه من دیار دیار
سحرده باد صبا، کېلتیره دی قوقینگ نی
هر گل نی که قوقله سم، قوقوینگدن بیر ایز بار
13
سېن جانیم سن جهانده، باشقه بیر یار ایسته مم
بو دل نینگ گلستانی، گل و گلزار ایسته مم
یانسم دېیمن کول بۉلیب، عشقینگ یېتردیر مېنگه
مېنیم رقیبیم مېنیم، باشقه عیار ایسته مم
14
نفس آلگنگه سبب، او لطف کمالینگ دیر
هر یانگه که باقسم من، کۉرگنیم خیالینگ دیر
اوزاق یا که یقین سن، فرقی یۉق من یقین من
عالم نی آیدینلتکن، ضیاسی جمالینگ دیر
15
بو جان مېنده امانت، جانان ایله قایم دیر
قوُل بۉلگن بو جانیم دیر، جانان اوچون دایم دیر
تیلده سکون قلبده حسرت، عشقی نی یازر قلمیم
ایمان و جسارتیم، آزاده او بایم دیر
16
یوره گیم مینگ بیر پاره، مجور من ستمینگندن
ایچکن من عشق شراب نی، سووسیز ساده دمینگدن
گرفتار بۉلماق منه، علاج سیز شیرین دردگه
نیمه دېیه ی محتشم! ینه عشق هردمینگدن
17
مضرابینگگه ایلیلدیم، قاچالمه دیم سفرگه
یوزینگ جهانیم بۉلگن، محبس خانه خیالده
سمت دلدارگه دېیه، هر صبا غزل بېردیم
حکمت مېندن دېب سودا، بو سوداگه یره
18
قلبیم ده کی محبت، کۉرمی سن زعفران نی
اخترسنگ تاپه سن سېن، کۉنگلیمدن گلستان نی
ظالم بولسنگ ـ ده خان سن گل کۉرر بو گلستان
باتیرسنگ ـ ده تیکن نی، کۉرمه یدی دل او آن نی
19
نېگه بو جور جفا، مشقتلی امتحان؟
بو ظلم دیر بوغه دی، روحیم نی زمان زمان
ظلمت نی قیرگین دلدن، ییغله مسین دل گلدن
پرده لنگن بیر رازدن، یانستمگین بیر نهان
20
عشقینگگه قسم ایچدیم، یار بونی مونده ی بیل هه
یانماق دیر مېنیم دردیم، تسلیلر نافله
قاوورگن عشق آتش، سۉنگدیرماق کېره کسیزمی؟
یانماق که مېنیم دردیم، انصاف سېنینگ قۉلینگده
21
عشق آتش له اوریلدیم، مینگ کره بو دیر دوا
شکایت اېتمم ذره، جان اوچون عالی رضا
نې زمان بیتر بیلمم، نوبتسیز سنجیلریم
ذاتاً هیچ کېلگن بۉلمس، عشق اقلیمیده صبا
22
قۉل قناتینگ قیریق، شو توشکن حالینگ داغ
یوره ک سن عاجز می سن؟ سزله ماغینگ اېمس ساغ
قتلنماق نی بیله سن، تورلی تورلی جفاده
ایتسم سن صبرلی بۉل، گل آچر البتکه باغ
23
متقاعد بیری من، عشقده بیر اعجمی من
سودا صحراسیده، کاروانینگ غمی من
اېپ سېنی اۉیله ماغدن، اۉزدن کېتتم مشکول
بیلمی من بو سایه م می، یۉقسه بو من می من؟
24
آتشیدن قورقمی من، یانماق مېنیم حاجتیم
عشققه که مېن توتساق من، سِری مېنیم ساعتیم
اچّیق شربتنی ایچماق، هر کیم نینگ احدی می او؟
شیرین دیر اچّیقلیگی، لذتی اهلیتیم
25
عشق بیلن اوریلمسه، او نازنین یوره گینگ
آنگله مسنگ حق نی سن، نې فایده دیر او یوکینگ؟
تککه گه متفکر، درویش بۉلسنگ نې چیقر؛
سودا آتش سِری نی، بیلمسه تېوره گینگ؟
26
مېنی بیلمگن حیات یا اۉلدیر یا که تولدیر
یالغیزلیک بویوک دردیم یا اۉلدیر یا که کولدیر
عشقدن ایلیکلریمگه سنجیلی دردلر ایلگن
قره مسنگ خراب من یا کولدیر یا که اۉلدیر
27
نیمه قیلدینگ سېن مېنگه؟ سِری نی بیلالمه دیم
افشاگه واقف بۉلیب، بیر علاج ایلالمه دیم
دلیم منسیز سېن له او، حالی عجایب مهال
نی یازدینگ سن بختیمگه، بېلگی لی کېلالمه دیم
28
آرمانلری ساوریلگن یانیغ بۉلگن کۉنگیلیم
هرجایی سودالرگه اینمه یدی یانیغ دلیم
گپلر توگلگن یېرده نه سۉز کېره ک نه نفس
قوشلرنینگ کۉز یاشیده محفوظ مېنیم اۉلیمیم
29
بیلدیم که یمینلرینگ بیر یالغاندن عبارت
معنانی ییتیرگنلر قالمگن اهلیت
سېس و نفس کیسیلگن یۉق سېندن هیچ بیر خبر
توگلدی می قلمینگ یا یازیلکان بیر خط؟
30
بېردی نفس بو جانگه دلربا بۉگن کۉزینگ
جانگه مسکر اولر دیر، تاتلی شیرین سۉزینگ
قیامت دیر الده تسم حتی سېن بیلن سېنی
غزللریمگه سبب، قلبگه سېن گلدن یوزینگ
31
نفس بېردی بو جانگه صداقتلی نیازینگ
قیشدن بهار نی آچیب عشق نی یره تتی یازینگ
سېنی سېنینگ له بیله، الده تماق قیامتیم
رباعیلرگه سبب، دوداغلرینگدن نازینگ
32
عشق، فقیرده بیرثروت، آلاو بیلدېک عشق نی بیز
کرم و لطف بو دیرکه، شکایتلی اېمس میز
آلاو بۉلمسه سیزده، پروانه ایلنه می؟
یانیب کول بۉله می هیچ، نارین و تر و تمیز؟
33
ظلمینگه زار من گلیم، فریاد بو، جزا اېمس
خوشلیگینگ قلب ایسته گی، طلبیم اغضا اېمس
راضی من ظلمینگده، خاطرلهنیب بۉلسم من
درد آتشینگ له یانماق، گپیم بیر هوا اېمس
34
کیمگه گیر بۉلیب کېتینگ؟ قالدیم بۉلیب بېچاره
دواسیز دردلریمگه، سنسیزلیک می بیر چاره؟
یانیب قاوریلگن کۉنگلیم، سنسیز بیر نفس آلمس
سېنینگ یوزینگ جهانی، کۉرمه سنگ جگر پاره
35
گاه هلالده واو بۉلدیم، گاه تولگن آی ده بیر میم
الف الف سوزیلدیم، سرغه ییب دیم
سودانینگ دالغه سیدن، ضررلرگه توشدیم من
قاووشماق کېلمه دی که، غملرگه بۉلدیم یېم
36
الفیدن خبرسیز، یالغانلرده ماهر
دوداغدن توکیلگن سۉز، هر بیری سی بیر سِر
اینجه سۉزلری بیلن، بوستانلرگه گل ایکن
مزاریده قلمی، اوزه نیب یاتکن شاعر
37
پریشان اېتتی مېنی، او آسمان کۉزلرینگ
یالغیز سېنگه قره تکن، دردگه درمان کۉزلرینگ
سما یولدوزی کبی، یېر یوزیده نرگسلر
من نې یازسم طرفسیز، مطلوع امان کۉزلرینگ
38
بیر محبت سودانینگ، سوزانی توشدی جانگه
یاقتی ییقتی قاووردی، دل توشدی هیجانگه
ویران قیلیب تشله دی، کۉنگیلنینگ سرایی نی
قویاش پارچه سی او گل، کېتتی او قیزیل قانگه
39
کائناتدن عشق نی تات، یره تکن یېرده می سن؟
مینگ بیر آنگلملی حیات، او بیتکن یېرده می سن؟
هر شی سما گه تورگن، سرخوش کېچه لرینگده
زمان و مکان اوندن، او ایتکن یېرده می سن؟
40
یولدوزلرگه بیر اۉرنک، آی گه رقیب سن آشکار
ریحان گل کۉنگیللرده، حسرتیم سن، بو یار
عشق نینگ قیزیل رنگیگه، قوشیلگن باقیشلرینگ
اېپ سن سن دېیه آقر، کۉز یاشلر ایچیمده بار
41
نورینگ منور قالر، قارانغی ظلمتده
حسرت نی آزای تیریر، سېنی حسله سم بختده
گناه لر کفالتی، بیر دامله کۉز یاشیم دیر
صمیمی قوُل بۉلگنیم، بو یاش بو حقیقتده
42
محبت بیر گلی سن، جنت اوچون ایمانیم
ایمانیم کبی گل سن، سنبل و ارغوانیم
ریحان کبی کوکلی سن، زمین من، اشغالده سن
بیر رویا مثالی سن، جانیمگه سن جانانیم
43
کیس بۉینیم نی دوست دېیه، قیلیچینگ له امانسیز
سِر اېشکلرنی آچکین، یاق تنیم نی قانسیز
هر ذره مده سېن بارسن، سایه نگ بدنیمده
آل مېنی اۉزینگگه، قۉیمه مېنی جانسیز
44
سۉنگ ظفر له سۉنگ لنسین، بو مقدس سفریم
قوشیلسین مصره لرگه، عشق له یازگن اثریم
قلبلرگه بو قازیلسین، بو سفرنینگ آماجی
هیچ زمان اۉلمس شاعر، بو دیر مېنیم سِریم
45
گلستان، مستانه دیر، کېلیشنگ له دنیاده
مېن هر تورلی غمده، سېن غمسیز رویاده
توگلدیم خراب بۉلدیم، عشق کبری بیلن سېن له
سېن ایری بیر دنیاده، مېن بولانیق دریاده
46
قیش ایلیلگن بو بیر آن، سنسیزلیکدن زمان
او جادو کۉزلرینگگه، غزل اۉقیگن آسمان
کائنات کۉز یاشی له، اسراری نی سوردیرگن
دېوان نینگده تیز چوککن، بنده لری له جانان
47
جهانگیر شفقلرده، رقصگه توشر غزللر
آرامیش قلبگه بېریب، یانستیرلر گللر
برچه رنگ له آچیلیر، غزللر له برچه گل
تیکنی بیلن سېور، بو مېنیم دېب بلبللر
48
سېنینگ کۉچ ینگ له یانر، سودالی ستاره لر
بیر نظرینگ بیلن، توتیشمس یره لر
سِر قیلیب سقله دینگ، کائنات کتابی نی
یانیب یانیب رقصده دیر، توتیشگن سیاره لر
49
اوریلیب پارله دی قویاش، بو نور قیناق دېب تنینگنی
کۉک یوزی اصولینچه، قوقوله دی بدنینگنی
زهرا بخیللیگیدن، انقراض اوردی اۉزگه
کېچه مهتابی سوزیلدی، اۉپه ی دېب دینینگنی
50
بیر بهار آقشامیدن، آلدی بېرمه ی آرمان
گل پیچان دېک اۉره دی، من حاکم من دېب فغان
یریم عصرلی حسرت، بیتمه دی آرمانلر له
سِرلر آره سیدن، اېپ بېردی حیات گریان
51
الف کبی قیامده، حسُنینگگه هلال بۉلدیم
واو بۉلیب بکیلیب من، کۉز یاشلر بیلن سۉلدیم
هر ذره م ایچ قیریقلی، اېپ اسمینگ نی ایقیرگن
ایلیکلریم نفسسیز، وفاسیزلیکدن اۉلدیم
52
ناز، جفا، ستم، کدر له آغریگه یېتر
بلکه یازیلگن نفسگه، اوندن بو یره یېتر
سنجیلی بیر راحتلی، کافی کېلمس البت
یوزینگ دیر قلب جهانی، سمتی اېسه یېتیر
53
روحیم قۉل پنجه دیوان، توخته گن سېنگه، اما
بلبل دېوانه دل، من بیچاره اغما
فضاده سیاره لر، اسم ینگ له دۉنر تورور
یېتی قت کۉک پروانه، همه اورده دایما
54
اراده نگ له ارغوان، معصوم ماه حور حال آلدی
کۉزلریمده اۉزلمی، یالغیز باقیشی قالدی
سۉنگسیز معطردن گلشن، مقام یۉلی اېپ روشن
باش کوترگن امیدیم، ینه هجرانگه تالدی
55
بو قنده ی بیر عشق، تیریندن مېنی یاقتی
کۉزیم کۉرمس هیچ کیم نی، نوری اېپ سېنگه باقتی
وصلتدن قورقه من، ازرده بۉلر دېب تنی
سۉنگسیز الهام، ذوق صفا، بو عشقدن آقتی
56
گاه هلالدېک واو بۉلدیم، گاه همه آی ده بیرمیم
الف الف سوزیلیب، آرزولر له بیر دیم
سودانینگ توپانیدن، بیریلدیم ضررلرگه
سنسیز بو حیاتیم دیر، بو حالیم له من کیم؟
57
یوره ک ینه شانسلی سن، کېلدی بکون مرشدینگ
حسرتی نی چېکیدینگ اما، قۉتلوع بۉلسین دردینگ
بیرم می یا که غم؟ آنگله مه دینگ بیر تورلی
سۉنگیده آنگلتیر او، یا غم یا که امیدینگ
58
تور ای عاشق یوره ک، بوتون کبر نی آت
اونده ی بیر عشق یشه، تیتره سین هر یېرده تات
اۉزینگ یرهت سیستم نی، هرکیم جنت دېب کۉرسین
حراملرنی حلال قیل، یشم قاعده گه اینات
59
سېنی هر کۉرگنیمده، عشققه عاشق مینگ کره من
عمر بۉیی قۉینینگده، یاتسم عشقدن حصه من
ناز اېتسنگ عذاب آتسنگ، اوزاغده ـ ده بۉلسنگ
چیقرسنگ حافظه دن، ینه سېنی سېوه من
60
پنجره نگه داملهب سوو، بیر دامله یامغیر بۉلسم
گل بۉلسنگ گلدانیده، قۉینینگگه اینیب کولسم
قوقله سم قوقینگ نی من، گل نی ایسکه گن کبی
نفسینگگه قریشیب، مینگ کره سېنگه اۉلسم
61
اۉلمس او یوره ک، عشق بیلن تیریک بۉلسه
یره یوره ککه عشقدن، بیر مرهم سورتیب کولسه
هر ذره کائنات نینگ، ایزیگه بیزدن ایز بار
بو عشق نینگ بیر سِری دیر، اگر آنگلمدن تولسه
62
قلبیمده محفوظ بو عشق، انتظارلیک اویغاندی
کۉزلریمدن بیر نور، سېن تېنگریم دېب ایناندی
ریحانینگ مطلوعلیگی، جنتینگدن کېلگن دیر
سماواتدن آی قویاش، مالک سن دېب ایشاندی
63
چېکیلمه یدی بو عمر، یارسیز، عشقسیز، هوسسیز
جانگه سېوگی جان بېرگن، او بۉلمسه نفسسیز
بیر جنت بار ایچیمده، مېنده قاله من دېیه
بیر سن یره تیم مېنده، سندن خبرسیز سېسسیز
64
یاد بیلن صفا تاپر، غم و دردنینگ پنجه سی
سېسلنیر دلدن کېلسه، تېنگری نینگ گۉزل سېسی
روحلرگه نفس بۉلیب، مغرور منلرنی آلر
گناه لری نی یوور، کېلسه اوندن نفسی
65
بهاریمده مینگ سِرلی، بیر آتش سوزان می سن؟
خیاللریمده بیر جان، جان بېرگن جانان می سن؟
دایرم نینگ ساحلیده، محتشم بیر منظره
یۉقسه سېن ـ ده مېن کبی، عشقدن بیر نالان می سن؟
66
اوزاغلردن اېشیتیلدی، سودانینگ فیسیلتی سی
آیدینلتتی روحیم نی، آلدی حسیلتی سی
قطب ده کی یولدوزکبی، اوزاغدن عشق نوری سن
قارانغی کېچه لرنینگ، عشق اوچون اېسیلتی سی
67
عبید دیواندن اۉقیب، عشق نی اوندن اېشیتکین
ازبک بۉلگن حالینگنی، اوندن آلیب بیتکین
توش سوداگه مېن کبی، اینانگین عقلینگ بیلن
خلقینگ اوچون بو عشق نی، تاریخدن آلیب ایتکین
68
شاه سلطان نوایی نی، عشق کۉز بیلن قره
عشقدن سودانی تاپیب، اوندن اۉقیب یره
هر سۉزی نی مینگ کره، مینگ کره سن اۉقیگین
هر سۉزی نی معنالهب، عقل ساچینگنی تره
69
نادره نی اۉقیگین، آنه تیل ازبکچه دن
روح ینگگه نفس آلگین، بو قیمتلی حقچه دن
افتخار قیل تیلگینگه، اۉنلر شاعرنی بېرگن
بو شاعرلردن پند آل، یره تیلگن باغچه دن
70
دردلی بو عمرگه، سۉنگسیز هیجان می سن؟
کۉزلریمگه عشق، جان می سن جانان می سن؟
بیلمه دیم من کیم سن سېن، حسیمدن نهانیم می؟
یۉقسه بیلیلمگن سِر، بدنیمدن جان می سن؟
71
الفی نی اۉقیمه ی، یالغانلرده ماهر
گل ایکن زمینلرگه بۉلمه ی کویر بایر
سایه سی له قاوریلگن، اېشیتیب و گپیریب و یانگن
مزاریده قلمی، اۉزه نگن یاتکن شاعر
72
بو قنده ی بد دعا دیر؟ ییغله دینگ کۉز یاش توکیب
قنده ی بو بیر دعا دیر؟ ییغله تتی غم نی ایکیب
عفو اېتماق مروت دیر، بو حیات نینگ ایچینده
همتدن هراس کېلمس، غم درزی نی تیکیب
73
سلامت له کېل جانیم، هم گلیم سن بلبلیم
یوره ککه دامله گن نم، هم ریحان منزلیم
درد هجران یامان او، دل قیغودن ضیق او
بو دل نینگ قیغوسیگه، لطف قیلیب کېل گلیم
74
باش ایندیم کۉزلرینگگه، سودانینگ صفتی دېب
ایمانلریم توگلمس، اۉپسم بو حسرتی دېب
یشه نگن یشه نمگن، کېلگن کېتکن عشقلر
یولدوزلر له شاهد دیر، قوُل من بو دوستی دېب
75
اېندی کېلمه همت اېت، دلده هجران الم بار
گلدن ناز بار بلبلگه، ارغواندن ستم بار
ممکن می بیر حسرتگه، بیر کۉپ مقام بولینسین؟
ینه من حسرتینگدن، ایته ی می که کرم بار؟
76
کیمسه بیلمس قلبیم نینگ حسرتی نی، فغانیم بیلیر
مېن و سېن و کیمسه بیلمس، یالغیزچه جانیم بیلیر
سقله دیم من اۉزیمدن ـ ده، حق بیلر بو سودانی
سِر استادی شاه سلطانیم، مقدس خانیم بیلیر
77
کۉنگیلی نینگ ایچیده، دردی نی تاشیگن گل
حسرتی نی قلبیده، داستان لشتیرگن بلبل
درد و الم و عشق نی، اصل تمثیل چیلری
آلسینلر ایچگه مېنی، سېوینسین غریب کۉنگیل
78
حسرت ینگ له گریانیم، هر نفس بیر آه بۉلگن
ماضی خاطره لردن، یوره گیم یره بۉلگن
کون بیتر دوران کېلر، کول بۉلر گناه لریم
پیشیب یانیب بو کۉنگیل، مقدس قصه بۉلگن
79
قویاش قۉینیگه آلیب، اوپیب اوپیب قوقله گن آی نی
رنگلر و شکل بېریب، دنیا گه بېرگن یای نی
قاپقره قارانغیده، پارلتکن گردنلیک دېک
قندیل قیلیب دنیاگه، کۉرستکن اۉزدن بای نی
80
اې بیر بیلسنگ جانانیم، سودانینگ بادی نی
یالغیز بو تیندیرر، یورک نینگ فریادی نی
خزانیم بهارگه اۉتکن، بیر اینجه کولشینگ له
یریم عصرلی چینارگه، بېرگن سن عشق یادی نی
81
سېنی تاپتیم قلبیمدن، بو گۉزل بیر آن
اۉنسکیزگه کېتتیم من، اېلی آلتی یاشیم شان
بیر کونیمگه توتیلسنگ، بیتمه گن سودامگه
بیر کون یېتر یشه سم، قالگن عمریمگه او جان
82
لبلریده سرزنش، کۉزلرده کی یاش مېنیم
تیلیده آه و سکوت، قلبی ده کی کاش مېنیم
مروت انسان یولدوزی، افسونگه اېمس قیناق
آه انسان من گرفتار، خطاگه یولداش مېنیم
83
واقف نی چېکن تاغلر، کۉکسیده عشق غزلی
سحرده قاوریلگن یوره ک، گل اوچون اینگن بلبلی
فرقی گه باریب بیلسک، هر یانی قوقر اسرار
ذکر گه تورگن حالی دیر، رب یگه توشکن تیلی
84
بیر یانیمده دعالر، بیر یانیمده قیامت
کۉکسیمده ایمانیم بار، یۉلیمگه او سلامت
ربیمدن بو حیاتیم، لطف بۉلگن و مهربان
سوداسیگه توشیب من، جان اونگه قامت
85
بیردن اېشیک نی آچیب، عشق دېب دنیامگه کیردینگ
سودانینگ آلاوی نی، شراب قیلیب بېردینگ
آتش نی جامده یاقیب، شراب دېب ایچیریب
لیلا بۉلیب جانیمگه، آتشدن گل نی تیردینگ
86
قویاش اونده ی توتیشدی، سیمادن هفت رنگ یاندی
هفت رنگ بۉلیب سیمانگدن، دنیاگه یقین ایندی
آرمان بیلن ایلندی، ایس ینگنی آلماق اوچون
سېسسزچه کۉکدن اینیب، کۉکسینگه سقلندی
87
یانینگده بۉلسم بیله، ینه یانینگگه حسرت
شانینگ اوچون اۉلسم ـ ده، ینه شانینگگه حسرت
حسرتلریم بیتمه یدی، کۉکسینگده یاتسم بیله
وجودینگگه جان بۉلسم، ینه جانینگگه حسرت
88
مجهول یغی گه توشیب، ییغله مه دنیا یوررکن
یشم اۉزی رویا دیر، بو حیات سوررکن
نمایشلی تیاتیر، اۉز نظمی بیلن بار دیر
بیلمچه دن اۉته یۉق، درسی نی عشق کۉررکن
89
گۉزل نینگ کۉزیگه باقسم یېترلی
بۉلیب سوو قوینیگه آقسم یېترلی
نې بۉلسه هم یقین بۉله ی گۉزلگه
یوره گنی سېوگیگه یاقسم یېترلی
90
اې ستمگر سېن مېنی، رسوای عالم قیلمگین
یاش کۉزیمدن توکتیریب، جانیمگه غمنی ایلمگین
همنشین اېتیب حریف نی، وفاسیز بۉلیب ینه
هر آغزگه گپ قیلیب، منسیز بۉلیب سن کېلمگین
91
خیاللرده هر کېچه، بیر ماه تابان سن
بو کۉز که عاشق سېنگه، بیر گل ریحان سن
ایچمه دن مست من، عشق بۉلگن کۉزلرینگدن
مسکر جفت یولدوزلی آی، بیر لب خندان سن
92
نې سېن او سن، اۉشه سن
نې مېن او من، بیله سن
بو دنیا سِردن توله
بیلمسنگ غم عصه سن
93
سقله کۉزلردن اونی، او تاتلی کولیشنگ نی
نظر تېگمه سین اونگه، نازله نیب یولیشنگ نی
عقلیم قوُل مقامی نی، او کۉزلر اوچون آلگن
ایله نیب رباعی لب، سېوه دی بۉلیشنگ نی
94
گۉزل بهار یشه یدی، بو مست بۉلگن شانیم
سېن باریدینگ او بۉلدی، بو مېنیم دیر بو جانیم
قوقوله دیم برچه گل نی، زلفینگدن گل قوقونی
بوی ینگ له آباد بۉلدیم، جانیمگه سن خانیم
95
گل بلبل غمزه سی له، کول اېندی
جنت بهار کۉکسینگگه، یول اېندی
عشق فصلی بهار کېلدی، عزیزم
مېنیم له سن بوتون بۉل، بۉل اېندی
96
بار سن مېنگه دېیر، بو دېیر آنه تیلیم
آلتین الماسدن اۉته، جان و دل و سنبلیم
اضطرابلی دلیم نی، اېپ سېن بیلن اووتیم
آنه و آته مقام، تیلیم سن منزلیم
97
آنه تیلده خط یازسه، اگر مېنیم تیلداشیم
کۉکدن برکت اینیب، پیشه دی خام آشیم
بیرلیک اگر بۉلیلسه، هر پیت هر آنده
ییگیت لریمگه قرهب، تاغ بۉله دی باشیم
98
کۉپ خواهله دیم بیر جان نی، جانانینگ ایچینده او
او جانان جانگه جان دیر، بو جانینگ ایچینده او
گاه اېله دیم مینگ حسرت، گاه بۉلدیم قیامت
دامله یاشلر آقیردیم، بو قانینگ ایچینده او
99
ینه دوستدن خبر کېلدی، مستلیککه توشدی کۉنگیل
بیر جام شراب کوثر کېلدی، دریا کبی جوشدی کۉنگیل
آچیلدی باغچه گلی، سیره دی ایچ بلبلی
دوست قۉلیدن بۉلدی بو، خوشلیکنی قوشدی کۉنگیل
100
آخرت نیرده دیر؟ رکوع سجده ده اېمس
اصالت نیرده دیر؟ باشده کی تاجده اېمس
اگر بیلماق خواهلی سن، باطنینگدن اخترگین
خداپرستلیک یۉلی، ساده چه حجده اېمس
سۉنگ!
اوکتای اسلانینگ قلمیدن (راه سوم)